Муҳокимаи лоиҳаи қонуни мукаммал

24 Декабр 2020, Панҷшанбе

Имрӯз дар Китобхонаи Маҷлиси намояндагони Маҷлиси Олии Ҷумҳурии Тоҷикистон мизи мудаввар ҷиҳати муҳокимаи лоиҳаи Қонуни Ҷумҳурии Тоҷикистон «Дар бораи захираҳои генетикии Ҷумҳурии Тоҷикистон» баргузор гардид.
Чорабинии мазкур бо ташаббуси Кумитаи Маҷлиси намояндагон Маҷлиси Олии Ҷумҳурии Тоҷикистон оид ба масъалаҳои аграрӣ, захираҳои об ва замин доир шуда, дар он вакилони Маҷлиси намояндагон, намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон, олимону мутахассисони Академияи миллии илмҳои Ҷумҳурии Тоҷикистон ва Академияи илмҳои кишоварзии Тоҷикистон иштирок ва суханронӣ намуданд.

Тавре раиси Кумитаи Маҷлиси намояндагон Маҷлиси Олии Ҷумҳурии Тоҷикистон оид ба масъалаҳои аграрӣ, захираҳои об ва замин Рустам Латифзода дар баромади худ қайд намуд, муҳокимаи лоиҳаи қонуни мазкур  аз баромади Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз 17 марти соли 2020 дар оғози иҷлосияи якуми Маҷлиси намояндагони Маҷлиси Олии Ҷумҳурии Тоҷикистон даъвати шашум оид ба самтҳои такмили қонунгузории кишвар вобаста ба талаботи замони муосир  бармеояд, ки масъалаҳои ҳифз ва истифодаи захираҳои генетики Ҷумҳурии Тоҷикистон омӯзиши нуқтаи назари вакилон, олимону коршиносон нисбати ин масъаларо дар бар мегирад.
Дар муҳокимаи Лоиҳаи Қонун ҳамчунин вакили Маҷлиси намояндагон Мирзоанвар Ахмедов маърӯза намуда, оид ба раванди эҷоди Қонун, тағйиру иловаҳо ба лоиҳаи Қонун ва таклифу пешниҳодоте, ки аз ҷониби олимону мутахассисони соҳаи кишоварзӣ ва генетикии растаниҳо пешниҳод шуда аст, ибрози андеша намуд.
Дар фарҷоми ҳамоиш, аз ҷониби вакилони мардумӣ ва олимону мутахассисон аснои муҳокимарониҳо перомуни такмили лоиҳаи қонун таклифу пешниҳодҳои судманд ироа гардид.

Илова кунед