Иқдоми навбатии вакил

22 Феврал 2021, Душанбе

Бо ташаббуси вакили Маҷлиси намояндагони Маҷлиси Олии Ҷумҳурии Тоҷикистон Раҳмонзода Зоир Файзалӣ беш аз як километр роҳи марказии деҳаи Муҳоҷирободи Ҷамоати деҳоти Дарқад, ки солиёни зиёд бетаъмир мондаву барои гузаштан монеа эҷод мекард, шағалпӯш гардид.
Вакил тасмим гирифтанд, ки аз ҳисоби маблағҳои шахсии худ беш аз 90 куб шағал харидорӣ намуда, роҳро таъмир намоянд.

Ҷавонони бонангу номуси деҳа ин иқдоми вакилро дастгирӣ намуда, ба ҳашари дастаҷамъона баромаданд ва дар тахту ҳамворкунии роҳ саҳми худро гузоштанд.
Аз ин амали хайру савоб сокинону меҳмонон, алалхусус ронандагон шоду мамнун гардида, ба вакили мардумӣ арзи сипос карданд.
Аз ҷумла, сокини деҳаи Муҳоҷиробод Юсупов Ғоибназар самимият ва миннатдории сокинони деҳаро ба вакил расонида, ин амали хайрхоҳонаро беҳтарин туҳфа ба аҳли деҳа дар солҳои 2019 – 2021 «Солҳои рушди деҳот, сайёҳӣ ва ҳунарҳои мардумӣ» арзёбӣ карда, иброз намуд, ки дар арафаи Наврӯзи байналмилалӣ ва омодагиҳо ба таҷлили ҷашни бузурги умумимилиамон, 30 – солагии Истиқлолияти давлатӣ чунин корҳои ободониву созандагӣ бисёр саривақтӣ мебошанд.
Ёдовар мешавем, ки ин иқдоми аввалини Раҳмонзода Зоир Файзалӣ набуда, мавсуф дар оғози пайдоиши пандемияи короновирус Ковид – 19 дар Тоҷикистон ба оилаҳои камбизоату муассисаҳои тиббии ҳудуди ҳавзаи Фархор 34 кумаки бевоситаи худро расонида буданд.


Илова кунед