Ҷаласаи нахустини Гурӯҳи дустӣ ва ҳамкории парлумонии Тоҷикистон ва Маҷлиси Шӯрои исломии Ҷумҳурии Исломии Эрон баргузор гардид

15 Март 2021, Душанбе

Имрӯз ҷаласаи Гурӯҳи дустӣ ва ҳамкории Маҷлиси намояндагони Тоҷикистон ва Маҷлиси Шӯрои исломии Ҷумҳурии Исломии Эрон ба таври реҷаи фосилавӣ (онлайн) баргузор гардид.
Дар назди иштирокчиёни ҷаласаи мазкур Раиси гурӯҳи дустӣ ва ҳамкории парлумонии Тоҷикистон ва Маҷлиси Шӯрои исломии Ҷумҳурии Исломии Эрон , раиси комиссияи одоби вакилони Маҷлиси намояндагон Файзулло Баротзода баромад намуда, изҳор намуд, ки «-мехостам аз фурсати муносиб истифода бурда, дуруд ва паёми Раиси Маҷлиси намояндагони Маҷлиси Олии Ҷумҳурии Тоҷикис­тон, муҳтарам Маҳмадтоир Зокирзодаро ба Раиси Маҷлиси Шӯрои исломии Ҷумҳурии исломии Эрон, ҷаноби оқои Муҳаммад Боқири Қолибоф ва Шумоён ҳамтоёни гиромӣ бирасонам.
Зарурати роҳандозӣ ва тавсеаи ҳамкории байнипарлумонӣ миёни Тоҷикистон ва Эрон борҳо дар вохӯриҳои сатҳи баланд миёни роҳбарони олии сиёсии Тоҷикистон, Ҷаноби Олӣ Эмомалӣ Раҳмон ва раисҷумҳури Эрон Ҷаноби оқои дуктур Ҳасани Рӯҳонӣ, инчунин дар сатҳи машваратҳои сиёсӣ байни вазоратҳои корҳои хориҷии ҳар ду кишвар муҳокима гардида буданд ва натиҷаҳои дилхоҳ ҳам ба даст омадааст”.

Дар мулоқот ҳамчунин таъкид карда шуд, ки робитаҳои байнипорлумонии Тоҷикис­тон ва Эрон дар доираи ҳамкориҳои бисёрҷониба барқарор шудаанд. Миёни Маҷлиси намояндагони Маҷлиси Олии Ҷумҳурии Тоҷикистон ва Маҷлиси Шӯрои Исломии ҶИЭ “Гурӯҳи дӯстӣ”-и байнипорлумонӣ амал менамояд. Сафари аъзои гурӯҳҳои дӯстии байнипорлумонии ҳарду кишвар ҷиҳати шиносоӣ бо фаъолияти гуногунҷабҳаи парламентҳо, боздиди онҳо аз мавзеъҳои таърихию фарҳангӣ, инчунин дидору мулоқот бо роҳбарони вазорату идораҳои ҳарду ҷониб анҷом гирифтаанд. Зимни сафари ҳайати 4-нафараи Маҷлиси намояндагони Маҷлиси Олиии Ҷумҳурии Тоҷикистон ба Теҳрон ҷиҳати иштирок дар 13-умин Конференсияи Ассамблеяи парламент­ҳои кишварҳои аъзои Созмони ҳамкории исломӣ мулоқоти ҳайати тоҷикистонӣ бо Раиси Маҷлиси шӯрои исломии Ҷумҳурии Исломии Эрон  А. Лориҷонӣ (16-17.01.2018) баргузор шуда буд.
Такмили сохтмони нақби «Истиқлол» дар сархатти ҳамкориҳо байни Тоҷикистону Эрон қарор дошта, яке аз намунаҳои беҳтарини ҳамкориҳо ба шумор меравад. Баъди ба имзо расидани Қарордод “Дар хусуси анҷоми марҳилаи дуюми лоиҳаи нақби Истиқлол” дар Тоҷикистон тавассути иҷрои корҳои лоиҳакашӣ, харидорӣ ва васлу насби системаҳои ҳавотозакунӣ, рӯшаноӣ, назорати бехатарӣ ва оташхомӯшкунӣ, ки 20 январи 2021 дар Душанбе доир гардид, корҳо дар ин самт пеш мераванд ва то ҷашни 30-солагии Истиқлолияти давлатии Ҷумҳурии Тоҷикистон муваффақона анҷом дода мешавад.
Ҳамчунин дар мулоқоти дуҷониба таъкид карда шуд, ки ҷониби эронӣ дар соли 2017 ду чорабинии фарҳангӣ – бузургдошти Қаҳрамонони Тоҷикистон устод Садриддин Айнӣ ва устод Бобоҷон Ғафуровро дар Теҳрон баргузор намуда, дар ин робита маҷмӯаи мақолаҳо ва суханрониҳоро низ мунташир кардааст. Дар тӯли соли 2016-2017 Сафорати Эрон дар шаҳри Душанбе ба муносибати 25-солагии барқарории робитаҳои дипломатии Тоҷикистону Эрон шаш китоби бузургони адабиёти тоҷику форс Абӯабдуллоҳи Рӯдакӣ, Абулқосим Фирдавсӣ, Абдураҳмони Ҷомӣ, Саъдии Шерозӣ, Хоҷа Ҳофизи Шерозӣ ва Убайди Зокониро ба чоп расонид. 3 марти соли 2019 дар Муассисаи фарҳангии Созмони ҳамкории иқтисодӣ дар Теҳрон маҳфили фарҳангии “Шоми Тоҷикистон” доир гардидааст, ки дар он китоби “Сотим Улуғзода ва фарҳанги миллӣ” дар бораи нависандаи тавонои тоҷик Сотим Улуғзода ба хатти форсӣ рӯнамоӣ карда шуд.
Дар фарҷоми мулоқот ҷонибҳо ба хулоса омаданд, ки дипломатияи парлумонӣ дар баробари дипломатияи анъанавӣ дар таҳким ва тавсеаи робитаҳои дуҷонибаи Тоҷикистону Эрон ҷойгоҳ ва саҳми боризи худро дорад. Гурӯҳи дӯстии парлумонӣ байни ин кишварҳо дар фаъолияти худ ин рисолатро ба ваҷҳи писандида анҷом хоҳад дод.
Дар мулоқот ҳамчунин аъзои Гурӯҳи дустӣ ва ҳамкории Маҷлиси намояндагони Тоҷикистон бо Маҷлиси Шӯрои исломии Ҷумҳурии Исломии Эрон  Матробиён Саодатшо, Наҷмидиниён Файзулло, Раҳматзода Рустам иштирок намуданд

Илова кунед