Парлумони касбии мамлакат Созишномаҳоро ба тасвиб расонид

27 Октябр 2021, Чоршанбе

Имрӯз ҷаласаи навбатии иҷлосияи сеюми Маҷлиси намояндагони Маҷлиси Олии Ҷумҳурии Тоҷикистон даъвати шашум таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода баргузор гардид.
Вакилон Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон оид ба ҳамлу нақли транзитии борҳои хатарнок тавассути ҳудуди Ҷумҳурии Ӯзбекистон-ро ба тасвиб расониданд.

Зимни баррасии Созишномаи мазкур масъулини соҳа иброз намуданд, ки санади мазкур бо мақсади дастгирӣ, густариш ва таҳкими муносибатҳои дӯстона ва ҳамкориҳои байни ҳарду давлат, барои дарёфти роҳҳои алтернативии воридоти борҳои хатарнок ба Ҷумҳурии Тоҷикистон, таъмини раванди муттасили фаъолияти субъектҳои хоҷагидори ватанӣ ва муҳайё намудани шароитҳои боз ҳам мусоид ҷиҳати рушди соҳаҳои гуногуни хоҷагии халқи Ҷумҳурии Тоҷикистон таҳия гардидааст.
Вакилони мардумӣ дар иҷлосия ҳамчунин Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин дар бораи пешниҳоди кумаки бебозгашт, Мактубҳои мубодилавӣ оид ба расонидани кумакҳои бебозгашт дар доираи Созишнома оид ба ҳамкорӣ байни Вазорати корҳои дохилии Ҷумҳурии Тоҷикистон ва Вазорати амнияти ҷамъиятии Ҷумҳурии Мардумии Чин аз 27 майи соли 2002, Мактубҳои мубодилавӣ оид ба расонидани кумакҳои бебозгашт дар доираи Созишнома оид ба ҳамкорӣ байни Вазорати корҳои дохилии Ҷумҳурии Тоҷикистон ва Вазорати амнияти ҷамъиятии Ҷумҳурии Мардумии Чин аз 27 майи соли 2002-ро ба тасвиб расониданд.
Дар иҷлосия ҳамчунин лоиҳаи Қонуни Ҷумҳурии Тоҷикистон «Дар бораи ворид намудани илова ба Кодекси замини Ҷумҳурии Тоҷикистон»,  лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таъмини аҳолӣ бо маҳсулоти хўроквории ғанигардонидашуда» ва лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи минтақаҳои кўҳии Ҷумҳурии Тоҷикистон» мавриди баррасии ҳамаҷониба қарор гирифта, дар интиҳо қарорҳои дахлдор қабул карда шуд.
Масъалаҳои рӯзномаи иҷлосияро ба вакилони Маҷлиси намояндагон масъулини соҳа-вазири нақлиёти Ҷумҳурии Тоҷикистон Азим Иброҳим, вазири молияи Ҷумҳурии Тоҷикистон Файзиддин Қаҳорзода, муовини аввали вазири корҳои дохилии Ҷумҳурии Тоҷикистон Абдураҳмон Аламшозода, муовини якуми  Раиси кумитаи давлатии идораи замин ва геодезияи Ҷумҳурии Тоҷикистон Азизмамад Каримзода, Раиси кумитаи бехатарии озуқаворӣ назди Ҳукумати Ҷумҳурии Тоҷикистон Муҳаммад Файзуллозода, сардори саридораи геологияи назди Ҳукумати Ҷумҳурии Тоҷикистон Илҳомҷон Оймуҳаммадзода ва вакилони Маҷлиси намояндагон Исмоилҷони Комрон, Неъматулло Холбойзода, Толибхон Азимзода, Қосимӣ Файзулло, Зоир Раҳмонзода ва Мавзӯна Шамсиддинзода муаррифӣ намуданд.  









Илова кунед